សុខភាព និងអនាម័យ

ជំងឺ ឬគ្រោះថ្នាក់នានបណ្តាលឱ្យមានភាពក្រីក្រ

ចំពោះអ្នកក្រីក្រពេលដែលមានជំងឺភាគច្រើន គឺមិន សូវស្វះស្វែងរកពេទ្យជំនាញ ឬទទួលការព្យាបាលឱ្យ បានត្រឹមត្រូវ និងទាន់ពេលវេលានោះទេ ដោយសារតែ​បញ្ហាជីវភាព អ្នកខ្លះទៀតព្រោះតែគ្មានថវិកាសុខចិត្ត ដេកចាំសេចក្តីស្លាប់។ អង្គការវឌ្ឍនភាពសហគមន៍ តែងតែជួយអ្នកក្រីក្រដែលមានជំងឺរាំរ៉ៃឱ្យទៅទទួល​​ការ​ព្យាបាលក្រោមការឧបត្ថមរបស់គម្រោងមួយផ្នែក និង មួយផ្នែកទៀតបានពីការចូលរួមគ្នារបស់សហគមន៍ ពួកគាត់។ ប៉ុន្តែបើក្នុងករណីបន្ទាន់ ហើយជាគ្រួសារ​ក្រីក្រ​ទៀតនោះអង្គការវឌ្ឍនភាពសហគមន៍នឹងរ៉ាប់រង លើចំណាយទាំងស្រុងសម្រាប់ការព្យាបាលជូនគាត់។ ឧទាហរណ៍ពេលដែលក្មេងម្នាក់ត្រូវបានម៉ូតូបុក​ហើយ ឪពុកម្តាយគ្មានលទ្ធភាពបញ្ជូនកូនទៅព្យាបាល ដូច នេះអង្គការវឌ្ឍនភាពសហគមន៍បានជួយទៅលើថ្លៃ ព្យាបាលទាំងស្រុងរហូតដល់ជាសះស្បើយ។ ជំងឺខ្លះ តម្រូវឱ្យទៅទទួលការព្យាបាលនៅទីក្រុងភ្នំពេញ ប៉ុនែ្ត សម្រាប់អ្នកក្រគ្រាន់តែថ្លៃធ្វើដំណើរទៅមក គឺស្មើនឹង ការចំណាយនៅក្នុងគ្រួសារគាត់មួយខែទៅ​ហើយ។ អ្នកខ្លះទៀតគ្មានជម្រើសក៏សម្រេចចិត្តលក់ទ្រព្យ សម្បត្តិដែលខ្លួនមានដូចជាដីធ្លី ស្រែចំការ សត្វចិញ្ចឹម មានអ្នកខ្លះទៀតដាច់ចិត្តលក់ផ្ទះសម្បែងក្នុង​តម្លៃ​ថោកដើម្បីយកមកចំណាយលើការព្យាបាលជំងឺក៏ មាន។ សម្រាប់អ្នកក្រពួកគាត់រកមួយថ្ងៃហូបមួយថ្ងៃ ចុះទម្រាំតែមានជំងឺដូចនេះទៀតតើនឹងទៅជាយ៉ាង​ណា? ហើយការធានារ៉ាប់រងលើផ្នែកសុខភាពក៏គ្មាន បើទៅចងការប្រាក់គេវិញ ត្រូវបានគេគិតការប្រាក់ខ្ពស់ រហូតដល់ ១០ %/ខែឯណោះ។

ក. ការអប់រំនៅតាមសហគមន៍

អង្គការវឌ្ឍនភាពសហគមនន៍​កំពុងធ្វើការជាមួយសាលា​បឋម និងមត្តេយ្យសិក្សាចំនួន ១៤ ដោយយើងបានធ្វើ​ការ​បណ្តុះបណ្តាលលោកគ្រូ អ្នកគ្រូលើជំនាញសុខភាពមាត់​ធ្មេញ និងអនាម័យទូទៅ។ នៅរៀងរាល់មួយសប្តាហ៍​ម្តង​យើងក៏មានការអនុវត្តសកម្មភាពដុសធ្មេញនៅខាងក្រៅថ្នាក់របស់សិស្សានុសិស្សក្រោមការត្រួតពិនិត្យរបស់លោកគ្រូ អ្នកគ្រូផងដែរ។ ក្រៅពីនោះយើងក៏បានរួមចំណែកក្នុង​សាងសង់ជាបង្គន់អនាម័យចំនួន ១២៤៨ ដល់កសិករ​ក្រីក្រសម្រាប់ប្រើប្រាស់នៅក្នុងគ្រួសាររបស់គាត់ផងដែរ។ មកដល់ថ្ងៃនេះកសិករក្រីក្រមានបង្គន់អនាម័យប្រើប្រាស់ប្រមាណ ៩៥% ហើយការអនុវត្តអនាម័យរបស់ប្រជាជន​ក៏មានការកែប្រែបានច្រើនដែរ។